Mattelift uf und abS'tuet öpper lüte - i bi da
Nume nid gsprängt - i chume ja
Eis zwänzg muesch zahle, ohni Halt
Obacht – E Tritt u dert e Spalt

Salü Petra, geit's dir guet?
Potz tuusig hesch e neue Huet ?
Chömet nu me ungeniert,
Bis jetz isch hie no nüt passiert.
Die Fahrt isch churz, doch d'Freud isch läng.
Türe zu - Pass uf uf d'Häng

Ufe – abe Plattform Matte
Wie im Läbe - Liecht u Schatte
Der eint, dä kennsch, der ander nid-
Bis nätt zu allne, so isch gschyd!

Bini dunde, glöggelets dobe,
Bini dobe lütets dunde.
Nobli Herre fini Dame
Nach em "von" e länge Name.
Fahreni syt Jahr u Tag.
Warum? Das isch e anderi Frag:
Wär Chlotz het, cha es Billett choufe,
Der ander nid, dä muess halt loufe

Ufe – abe Plattform Matte
Wie im Läbe Liecht u Schatte.

Der eint dä louft - der ander fahrt
Das isch Bärner Matte - Art!
Wär dinn isch i däm Chaschte, dä isch dinn,
Welle halte oder jufle het ke Sinn!
Hie git's nu me obe - unde -
Bisch schnäll o mit der Stadt verbunde!
Gleitig geit's grad wie im Schwick.
C'est la vie - das isch der Trick!

Ufe – abe Plattform Matte
Wie im Läbe Liecht u Schatte

Richt di y, dass d'obsi fahrsch
Süsch bisch de gli am .... Seili (Was dir wieder dänket?)
Ufe - abe wie im Läbe
Disem glingts, däm geits dernäbe
Im Bundehus, ir Politik
Im Gschäft u im Familieglück
I der Liebi u bim Fische
Glück u Päch tüe d'Charte mische
Hie die Chlyne, dert die Grosse
Die einte ds Fleisch, die andere d'Sosse
Obama, Merkel, Hollande, Putin
Jede seit, der ander spinn!
Der eint stygt us - der ander y -
So söll's sy!

Ufe – abe Plattform-Matte
Wie im Läbe .
Liecht u Schatte

obsi - nidsi
nidsi  - obsi ...

Text: Harry v. Graffenried
Bearbeitung: Rosmarie Büchler